De Lille dalk Kaapstad se burgemeester
2011-01-15 07:28
Kaapstad. – Patricia de Lille, OD-leier en Wes-Kaapse LUR vir maatskaplike dienste, is glo die gunsteling om die nuwe burgemeester van Kaapstad te word.
Volgens ingeligte bronne is De Lille en Grant Pascoe, DA-voorsitter in die Kaapse metro-streek en uitvoerende burgemeesterskomiteelid belas met maatskaplike ontwikkeling en spesiale projekte, in die binnebaan om oor te neem by Dan Plato.
In DA-kringe is daar ’n faksie wat sterk voel dit sal ’n meesterskuif wees as De Lille burgemeester word deurdat die provinsie sowel as die Kaapse stadsraad dan deur twee gesoute ystervroue bestuur sal word.
Met Helen Zille reeds in die stoel as Wes-Kaapse premier en met ’n vuurvreter-politikus soos De Lille kan die DA ’n steeds verdeelde ANC in die Wes-Kaap laat klippe kou, word gesê.
Nog ’n bron het bevestig dat De Lille die voorkeur-kandidaat is.
“Haar aanwysing as LUR was net tydelik.
“Die gedagte is dat sy haar onder die Wes-Kaapse kiesers moet vestig en dan gaan sy ná drie maande – in Maart – as burgemeesterskandidaat herontplooi word.
“Haar mandaat is om ’n nuwe soort kieser na die DA te bring,” het die bron gesê.
Stoere raadslede en ondersteuners wat ervaring in die DA opgedoen het, slyp egter hul messe en voel De Lille se ondersteunersbasis het weggekalwe nadat sy in alliansie met die DA gegaan het.
Pascoe-ondersteuners het gister self binnehoue geplant.
’n Raadslid en vertroueling van Pascoe het gesê: “Grant is die soort kandidaat wat jy teen die ANC in die politieke bokskryt instuur.
“Ons het nog geen verkiesing verloor met Grant aan die stuur van sake nie.”
Steven Otter, woordvoerder van De Lille, het by navraag gesê dit is te vroeg om te sê of sy ’n benoeming as burgemeesterskandidaat sal aanvaar.
Pascoe het wel erken hy is genader om hom verkiesbaar te stel.
“Ek oorweeg dit sterk, maar die besluit berus steeds by die party,” het hy gesê.
- Volg Nuus24 op Twitter
- Die Burger