De Lille betuig medelye ná bootongeluk

2012-10-14 10:03

Johannesburg – Patricia de Lille, Kaapstad se burgemeester, het haar medelye teenoor die familie van ‘n man wat in ‘n bootongeluk by Houtbaai gesterf het, uitgespreek.

“Ons gedagtes en gebede is met die familie en vriende van die oorledene en die van die vermiste slagoffer en beseerdes,” het sy gesê.

Sy het ook die Nasionale Seereddingsinstituut (NSRI) vir hul reddingspogings bedank.

Die NSRI het Saterdagaand hul soektog na ‘n vermiste man opgeskort.

Brad Geyser van die NSRI sê ‘n soektog na die een oorblywende vermiste mens – ‘n bemanningslid van die boot – is vroegoggend voortgesit.

Die huurboot – The Miroshga – het Saterdag om 15:00 naby Duiker-eiland omgekeer.

Geyser sê 34 mense is gered en een van die mans het in die ongeluk omgekom. Dit blyk dat die oorledene van die Verenigde Koninkryk afkomstig was.

“Die NSRI is bewus van Suid-Afrikaners, burgers van die Verenigde Koninkryk en Franse burgers wat aan boord was...”

Die oorsaak van die ongeluk is nog onbekend.

Volg Nuus24 op Twitter   

- SAPA