De Kock ‘het nog geen berou getoon'
2010-01-23 12:41
Pieter du Toit
Kaapstad. – Eugene de Kock moet bly net waar hy is – in die gevangenis.
Só sê James Selfe, DA-LP en woordvoerder oor korrektiewe dienste, ná ’n berig gister in Die Burger dat De Kock glo op die punt staan om sy sel te ontruim.
Volgens bronne na aan De Kock se verwagte kwytskelding kan hy binne twee weke tot ’n maand as ’n vry man uit die Pretoriase Sentrale Gevangenis stap as pres. Jacob Zuma glo ’n belofte aan hom nakom.
Die DA is egter nie oortuig só ’n kwytskelding sal in die belang van geregtigheid, die publiek of versoening wees nie. Die party sê De Kock het nog nie sy straf uitgedien nie, geen berou getoon nie en is ’n gevaar vir die samelewing. Boonop het hy “minstens ses mense doodgemaak” en gaan dit Selfe se verstand te bowe dat só iemand enigsins vir begenadiging in aanmerking kan kom.
“Die gedagte dat hy as ’n tipe gebaar saam met die bedrieër Schabir Shaik vrygelaat kan word, sal die morele verval in die ANC-regering bevestig.
“Dit sal die gesag van die regbank ondergrawe en ’n boodskap uitstuur dat diegene wat aan gruweldade skuldig bevind is as deel van ’n politieke kaartspel, vrygelaat kan word,” het Selfe in ’n verklaring gesê.
Die meeste van De Kock se aansoeke om amnestie by die Waarheid- en-versoeningskommissie is boonop verwerp en hy kon geen inligting oor sommige gruweldade gee nie.
Die DA meen dus De Kock kan geen nuwe inligting verskaf wat ’n kwytskelding sal regverdig nie.
“Om De Kock vry te laat sal nooit in die openbare belang wees nie. Dit sal net ou wonde oopkrap.” .
- Die Burger