De Doorns: Stakers verwelkom gesprekke
2013-01-11 15:34
De Doorns – Sommige stakende plaaswerkers het Vrydag gesprekke tussen vakbonde en plaasbestuurders verwelkom ná twee dae se gewelddadige betogings.
Die individuele boere het ooreengestem om ‘n vergadering wat deur Gerhard de Kock, voorsitter van die Cape Orchards-groep (COC) gereël is, by te woon.
Die COC verteenwoordig 12 plase in die gebied wat altesaam sowat drie miljoen bokse tafeldruiwe per jaar lewer.
“Ons is bly dat die [boere] bereid is om te onderhandel,” het Johannes Links, ‘n 29-jarige plaaswerker, Vrydag aan Sapa gesê.
Die gebied was Donderdag die middelpunt van gewelddadige botsings tussen betogers en die polisie.
Dit was Vrydag stil, met polisie wat die N1 gepatrolleer het. Die pad is steeds vir verkeer gesluit.
Links sê hy werk al die afgelope 16 jaar op plase in die gebied.
Hy is van mening dat boere wat sê hulle kan dit nie bekostig om R150 per dag aan plaaswerkers te betaal nie, onsin praat.
“Hulle maak elke jaar al hoe meer wins van ons werk... hulle is nie die verloorders nie, ons verloor,” het Links gesê.
Werkers verdien tans ‘n minimum loon van R69 per dag.
Die polisie monitor die situasie in verskeie dele van die Wes-Kaap.
– Volg Nuus24 op Twitter
- SAPA
