Dalai Lama wéér na SA genooi
2011-10-18 11:06
Johannesburg – Die Dalai Lama sal vir 'n derde keer in twee jaar om 'n Suid-Afrikaanse visum aansoek doen nadat Mangosuthu Buthelezi, IVP-leier, hom genooi het om aanstaande jaar 'n gebedsvergadering op Menseregtedag by te woon.
Die nuwe aansoek sal nóg 'n kopseer vir pres. Jacob Zuma wees. Zuma word daarvan beskuldig dat hy die kwessie ontduik nadat die regering se hantering van die Tibettaanse geestelike leier se visumaansoek vroeër vandeesmaand heftig gekritiseer is.
Buthelezi het in sy uitnodiging aan die Dalai Lama geskryf: "Ek het twee keer beplan en gehoop om jou te ontmoet om saam te bid, jou geestelike leiding te ontvang en die stand van die wêreld en sy politiek te bespreek".
Buthelezi en Mosiuoa Lekota, president van Cope, het gesê die Dalai Lama het aangedui dat hy die uitnodiging sal aanvaar.
Die Dalai Lama is vroeër vandeesmaand na emeritus-aartsbiskop Desmond Tutu se 80ste verjaardagvieringe genooi, maar kon nié die geleentheid bywoon nie, omdat sy visumaansoek nie betyds goedgekeur is nie.
– Lees meer hier
– Volg Nuus24 op Twitter