Dalai Lama kom nie, al kry hy nou visum

2011-10-06 19:56

Johannesburg – Die Dalai Lama sal nie Suid-Afrika besoek vir Emeritus-Aartsbiskop Desmond Tutu se 80ste verjaardagvieringe nie, selfs al word ‘n visum nou aan hom toegestaan, het die SABC Donderdag berig.

Die Dalai Lama se woordvoerder, Tenzin Taklha, het aan die uitsaaier gesê die logistiek van die reis sal te gekompliseerd wees.

“Om Sy Heiligheid nou na Suid-Afrika te neem, sal bloot onmoontlik wees. Om hom net by die lughawe te kry, sal ‘n hele dag neem... ons het nie eens kaartjies nie. Dit is buite die kwessie,” het hy gesê.

Die Tibettaanse geestelike leier het Dinsdag sy reis na Suid-Afrika gekanselleer nadat hy lank moes wag op terugvoer oor sy visumaansoek.

Die Desmond Tutu Vredesentrum het vroeër gesê adjunk-president Kgalema Motlanthe moet die visum-debakel regmaak en seker maak die Dalai Lama ontvang ‘n visum.
 
- Volg Nuus24 op Twitter

- SAPA