Dalai Lama-aansoek te vroeg, toe te laat
2011-12-06 09:02
Kaapstad. – Die minister van binnelandse sake het bloot “nie genoeg tyd gehad” om ’n besluit oor die Dalai Lama se visum-aansoek te neem nie.
Sy het die aansoek nooit afgekeur nie.
Só het dr. Nkosazana Dlamini-Zuma, minister van binnelandse sake, in ’n beantwoordende beëdigde verklaring gesê in die hofgeding met die IVP en Cope oor die regering se hantering van die visum-aansoek.
Cope en die IVP het dié rede as “oneerlik” afgeskiet.
Mangosuthu Buthelezi, IVP-leier, en Mosiuoa Lekota, Cope-leier, het al in Oktober ’n aansoek by die hooggeregshof in Kaapstad ingedien om die wettigheid en grondwetlikheid van die regering se optrede met die Dalai Lama se visum-aansoek te betwis. Hulle het aangevoer dat Dlamini-Zuma die aansoek moes oorweeg en verwerk, maar dat sy haar plig aan haar ampsgenoot in internasionale betrekkinge, Maite Nkoana-Mashabane, oorgedra het.
Die twee partye het in ’n gesamentlike verklaring gesê die Dalai Lama het aanvanklik vier maande voor sy beplande reis om ’n visum aansoek gedoen.
Die geestelike leier van Tibet is egter ingelig dat dit te vroeg is en dat hy die aansoek twee maande later moet indien.
Lekota het later gesê: “Die minister is oneerlik. Die Dalai Lama is aanvanklik weggewys en aangesê om op ’n spesifieke tyd aansoek te doen. Hy het dit gedoen en tog is sy aansoek nie betyds oorweeg nie. Dit is met opset gedoen.
“Hulle (die regering) het versuim om hul verantwoordelikhede na te kom.”
Lekota het voorts gesê alles dui daarop dat dr. Blade Nzimande, sekretaris-generaal van die SAKP, teen die Dalai Lama se aansoek gekant was. “Hy het dit selfs in ’n verklaring gesê. Ek vermoed daar was ’n stryery. Die regering moet dus net vir ’n slag eerlik wees hieroor.”
Emeritus aartsbiskop Desmond Tutu het die Tibettaanse geestelike leier na sy 80ste verjaardagviering genooi. Die Dalai Lama het egter sy reis gekanselleer weens ’n gesloer met die visum-aansoek.
Die saak sal Dinsdag deur regter Dennis Davis aangehoor word.
– Volg Nuus24 op Twitter
- Die Burger