Dakota-vliegramp: Geen oorlewendes gevind

2012-12-06 12:29

Kaapstad – Die Suid-Afrikaanse Nasionale Weermag (SANW) sê geen oorlewendes is gevind nadat ‘n militêre vliegtuig in KwaZulu-Natal neergestort het nie, het SA FM berig.

Die weermag sê ses bemanningslede en vyf passasiers was ten tyde van die ongeluk aan boord die Dakota.

Volksblad berig die passasiers was veiligheidswagte wat die vliegtuie en geboue van die lugmag moes gaan oppas het by die Mthatha-lughawe.

Dit volg nadat die SANW ook ontken het dat oudpres. Nelson Mandela  se mediese span aan boord die vliegtuig was.

“Die berigte is nie korrek nie,” het Siphiwe Dlamini, hoof van die weermag se kommunikasie, gesê.

Sapa berig die departement se woordvoerder, Xolani Mabanga, het vroeër bevestig dat die vliegtuig se wrak gevind is.

Die Dakota het Woensdagoggend omstreeks 08:00 van die Waterkloof-lugmagbasis in Pretoria opgestyg en sou om 10:00 in Mthatha in die Oos-Kaap land.

Dlamini wou ook nie bevestig hoeveel mense aan boord die vliegtuig was nie.

Beeld het vroeër berig die mediese span was moontlik aan boord. Die dagblad het bespiegel dat die span aan boord kon wees, aangesien die vliegtuig na Mthatha in die Oos-Kaap onderweg was, waar die oudpresident woon.

Volg Nuus24 op Twitter