Dag vier in hof vir Pistorius
2013-02-22 07:00
Pretoria – Die borgtogaansoek van die Paralimpiese atleet Oscar Pistorius sal Vrydag die vierde dag in die Pretoriase landdroshof betree.
Pistorius is verlede Donderdagoggend in hegtenis geneem nadat sy vriendin, die model Reeva Steenkamp in sy huis doodgeskiet is. Hy is Vrydag aangekla van moord.
Die ster-atleet het ontken dat hy Steenkamp doelbewus geskiet het, en het gesê hy het gedink daar was 'n inbreker toe hy skote na die badkamerdeur afgevuur het.
Adv. Gerrie Nel, staatsaanklaer, het die dag begin met die nuus dat die ondersoekbeampte, Hilton Botha, teregstaan op sewe aanklagte van poging tot moord.
Botha is later in die dag vervang as hoofondersoekbeampte in die saak.
Riah Phiyega, nasionale polisiehoof, het Donderdag gesê die Pistorius-ondersoek sal nou hanteer word deur 'n span wat gelei word deur die land se topspeurder, lt.genl. Vineshkumar Moonoo.
Nel het in die hof geluister hoe adv. Barry Roux, vir die verdediging, Botha se "swak" polisiewerk uitlig en het gesê die staat kan nie moord bewys nie.
Roux het gesê die paartjie was in 'n liefdevolle verhouding en dat Pistorius gewys het hy gee om deur Steenkamp by die trappe af te dra en om hulp te roep.
Hooflanddros Desmond Nair wou weet hoekom Pistorius se beëdigde verklaring nie melding maak van Steenkamp se reaksies toe hy na haar geroep het voor hy die skote na die badkamer afgevuur het nie.
Roux het gesê dit is "onwaarskynlik" dat sy sou reageer, omdat sy bang was.
Hy het verder aangevoer dat dit onwaarskynlik is dat Pistorius, wat 'n "ikoon" is, sal vlug.
Nel het gesê Pistorius verkeer onder die indruk dat hy dalk nie vervolg sal word vir die skietery nie.
Pistorius se "gebrek aan bereidwilligheid om verantwoordelikheid vir sy dade te aanvaar, maak hom 'n groter vlugrisiko", het Nel gesê.
Hofverrigtinge sal Vrydag om 10:00 begin.
– Volg Nuus24 op Twitter
- SAPA
