'Daar's gesloer met seun se behandeling'
2011-11-24 09:02
Kaapstad – Mediese personeel moes vinniger opgetree het toe ’n rugbyspeler van Mamre ’n rugmurgbesering in ’n vaste skrum opgedoen het.
Só het ’n advokaat Woensdag in die Wes-Kaapse hooggeregshof aangevoer in die saak waarin Charles Oppelt (26) van Mamre die Suid-Afrikaanse Rugbyunie (Saru), Boland-rugbyunie, Mamre-klub en die departement van gesondheid vir meer as R9 miljoen dagvaar.
Oppelt is op 23 Maart 2002 beseer toe hy 17 jaar oud was. Hy was haker van die Mamre-klub se eerste span en het in ’n vaste skrum ’n besering aan die rugmurg opgedoen. Hy is vandag in ’n rolstoel.
Oppelt het die betrokke dag tussen 14:15 en 14:45 erge rugbeserings opgedoen toe ’n vaste skrum inmekaargeval het.
Hy is na die Wesfleur-hospitaal op Atlantis gebring, waar hy omstreeks 15:30 aangekom het. Vandaar is hy na die Groote Schuur-hospitaal oorgeplaas en het omstreeks 17:59 daar aangekom. ’n Ortopediese chirurg het hom teen 20:00 geëvalueer. Hy is daarna na die Conradie-hospitaal se ruggraateenheid oorgeplaas, waar hy omstreeks 01:30 aangekom het. Hy is hier behandel.
Oppelt beweer die hospitaalpersoneel moes geweet het hy het ’n potensieel verlammende besering opgedoen en dat daar vinniger opgetree moes word.
Dr. David Welsh, ’n konsult-neurochirurg by die Groote Schuur-hospitaal, het aan die hof gesê die medici het in alle gevalle slegs protokol gevolg.
“Dinge vat tyd en moet ordentlik gedoen word.”
Adv. Willie Duminy SC, vir Oppelt, het dit aan Welsh gestel dat sowat vier uur ’n impak op die sukses van vordering op sy kliënt se toestand sou hê. “Die behoefte aan spoedige behandeling was van deurslaggewende belang.”
Welsh het gesê vier uur word nie universeel deur alle medici as ’n afsnypunt aanvaar nie. Die werklikheid is dat daar ook ander pasiënte is wat dié dokters moet sien.
Volgens Welsh is daar protokol en riglyne waarby personeel moet hou sodat die stelsel vlot kan verloop. Die beskikbare hulpbronne moet ook in ag geneem word.
Daarby is daar ook kenners wat meen dat dit beter is om langer as vier uur te wag voordat daar op ’n pasiënt met sodanige beserings geopereer word.
Die verhoor duur voort.
Volg Nuus24 op Twitter.
- Die Burger