Daar is 80 skole te min in Wes-Kaap
2009-12-09 07:21
Marelize Potgieter
Kaapstad - Die nuwe jaar is om die draai en die Wes-Kaapse onderwysdepartement (WKOD) het 80 skole te min in die provinsie.
Dít, asook groot klasse, geldelike uitdagings en ’n hoë onderwyser-leerder-ratio in Wes-Kaapse skole, is van die probleme waardeur die departement in 2010 in die gesig gestaar word.
Die WKOD was egter trots om gister die eerste departement in die land te wees wat riglyne en beplanning vir die akademiese jaar van 2010 bekend te maak.
Dié riglyne is ’n poging om gehalte-onderrig vir leerders in die Wes-Kaap te verseker, het die Wes-Kaapse minister van onderwys, mnr. Donald Grant, gesê.
Die planne sluit in ’n strategiese tienpuntplan vir 2010 tot 2019, ’n beplanningskalender vir skole vir 2010 asook briewe aan hoofde, onderwysers en ouers.
’n Taakspan sal uitdagings soos die infrastruktuur in skole, veiligheidsmaatreëls, kurrikulum en assessering, toelatingsgeld vir leerders en personeelbestuur vasstel en monitor.
“Migrasie is ’n groot probleem in die Wes-Kaap. Sowat 1 200 leerders stroom die provinsie jaarliks binne en daarom het die WKOD reserwe-poste in plek om oorvol skole in die provinsie te akkommodeer,” het Grant gesê.
Die provinsiale voorsitter van die Suid-Afrikaanse Demokratiese Onderwysersunie, mnr. Bongani kaMcoyana, het gesê die WKOD se beplanning vir 2010 klink baie belowend. Hy het egter die pogings van die departement om van skoolhoofde te verwag om ’n prestasie-ooreenkoms te teken, ten sterkste afgekeur.
Die provinsiale voorsitter van die Suid-Afrikaanse Onderwysersunie, mnr. Pieter Coetzee, het gesê die sukses van dié beplanning lê daarin of dit geïmplementeer gaan word. Hy het gesê dienslewering is ’n kwessie wat aandag moet kry. Hy hoop dat daar by die beplanning en implementering van die jaarplan gehou sal word.
– Die Burger