DNS verbind Lindley-verdagtes met moord
2011-06-01 23:01
Bloemfontein - DNS-bewyse verbind sommige van die ses verdagtes in die moord op die Potgieter-gesin op hul plaas naby Lindley in Desember 2010, het die Bloemfonteinse Hooggeregshof Woensdag gehoor.
Ao. Danie Bierman, ondersoeker, het getuig dat bloed van Attie Potgieter en sy vrou, Wilna, op ‘n 9mm-pistool was wat by Diphapang Motaung se huis gevind is.
Klere wat deur Motaung se ma aan die polisie oorhandig is, het ook bloedvlekke op gehad. DNS-toetse het getoon dat dit Attie Potgieter se bloed was.
Motaung en vyf ander mans, tussen die ouderdomme van 18 en 33, word aangekla van die moord op die boer Attie Potgieter, sy vrou Wilna en hul tweejarige dogter.
Die ander mans is Stemmer Mofokeng (23), Tapa Mofokeng (34), Paulus Khumalo (23), Telleko Seekoei (20) en Tshekolo Lelala, almal van Lindley.
Hulle het almal onskuldig gepleit op drie aanklagte van moord, een van roof met verswarende omstandighede en aanklagte wat met die onwettige besit van vuurwapens en ammunisie verband hou.
Klere van Seekoei waarop beslag gelê is, is ook deur DNS-toetse met Attie Potgieter verbind.
Die panga wat as bewysstuk deur die staat ingehandig is, het bloed van Potgieter en sy dogter op gehad.
Bierman het ook getuig dat Wilna se selfoon deur een van die beskuldigdes gebruik is om ‘n SMS te stuur ure ná die aanval.
Bierman sal na verwagting Donderdag in kruisondervraging deur die verdediging getuig.
- Volg Nuus24 op Twitter
- SAPA