DJ Ossewa-ongeluk word ondersoek
2010-08-29 21:00
Johannesburg – Raapie Knaapie, ‘n lid van die Afrikaanse musiekgroep DJ Ossewa, is dood en drie ander lede van die groep is beseer nadat hulle in ‘n motorongeluk naby Brits betrokke was, het die polisie in die Noordwes Sondag gesê.
Volgens kapt. Aafje Botma, polisiewoordvoerder, sal ‘n saak van strafbare manslag ondersoek word.
Die ongeluk het Sondagoggend op die N4 naby Brits gebeur. ‘n Ander voertuig was ook in die ongeluk betrokke.
Dit is nog nie duidelik wat die ongeluk veroorsaak het nie.
Volgens Botma is die drie ander lede van die groep beseer.
Die bestuurder en passasier van die ander motor het ligte beserings opgedoen.
Volgens die groep se Facebook-blad bestaan die groep uit Piet Pompies, Raapie Knaapie, Daniel Jakobus Ossewa en Jerbes die leeu boer.
Volg Nuus24 op Twitter.
- SAPA