DG sê nee vir vet tjek, want sy wil ‘werk vir my geld’
2010-08-27 08:13
Johannesburg - Sy kon ’n goue handdruk van byna R3 miljoen van die staat gekry het, maar het geweier – want sy wil werk vir haar geld.
Mamodupi Mohlala, wat verlede maand as direkteur-generaal (DG) van kommunikasie afgedank is, het ’n skeidingspakket van R2,9 miljoen van die hand gewys omdat sy “nog baie het om by te dra”.
Ingevolge ’n skikkingsooreenkoms tussen haar en genl. Siphiwe Nyanda, minister van kommunikasie, trek sy haar saak in die arbeidshof terug en Nyanda trek sy afdankingsbrief aan haar terug.
Mohlala het gister bevestig sy het ’n aanvanklike skikkingsaanbod van R1,6 miljoen en later ’n verbeterde aanbod van R2,9 miljoen, insluitend regskoste, van die hand gewys in haar verbete stryd om haar werk te behou.
“Ek wil graag in die openbare sektor wérk vir my geld. Ek is jonk, het nog baie wat ek kan bydra en wil graag aanbly.
“Ek kan nie wag om terug te keer werk toe nie,” het sy gesê.
Ingevolge die skikking wat bereik is, moet Mohlala vir ’n maand met spesiale verlof gaan.
Volgens haar is sy nou as DG heraangestel en kan sy op 27 September weer begin werk.
Sy moet egter na ’n ander pos skuif indien Richard Baloyi, minister van die staatsdiens en openbare administrasie, in dié maand vir haar ’n ander, soortgelyke pos in die staatsdiens kry.
Die departement het gister in ’n verklaring gesê Mohlala is nié in haar pos as DG heraangestel nie.
Die skikkingsooreenkoms is glo net aangegaan om haar weer as staatsamptenaar aan te stel sodat Baloyi ander moontlikhede vir haar kan ondersoek.
Mohlala het gesê as sy na ’n ander pos oorgeplaas word, sal sy graag in die inligtings- en kommunikasietegnologie-bedryf betrokke wil bly.
As sy in die departement van kommunikasie bly, meen sy sal sy goed met Nyanda kan saamwerk.
- Beeld