DA wens ANC geluk met 100 jaar
2012-01-07 21:00
Johannesburg – Die DA-leier Helen Zille het Saterdag die ANC gelukgewens met die viering van hul honderdste bestaansjaar.
“Ek gee my eerlike gelukwensing aan die ANC en sy leier, president Zuma, dat hulle hierdie indrukwekkende mylpaal bereik het,” het Zille in ‘n verklaring gesê.
“Hierdie 100 jaar toon ‘n buitengewone rekord wat nêrens anders op die kontinent van Afrika gevind word nie. As die ANC sê hierdie is baie meer as ‘n viering van die 100ste verjaardag van ‘n politieke party, stem ons saam.
“Dit verteenwoordig geskiedenis wat nog aan die gang is, ‘n strewe na menseregte en die koms van ‘n demokrasie ná ‘n lang, moeilike stryd wat meer as 80 jaar geneem het,” het sy bygevoeg.
Sy sê die waardes wat aangeneem is deur die pa van die nuwe Suid-Afrika, Nelson Mandela, weerklink nog sterk by die mense van Suid-Afrika en hierdie menslike, nie-rasse visie van gelykheid vir almal onder ‘n demokratiese stelsel het die land uit die donker dae van onderdrukking gelei en dit ferm op die pad na vryheid geplaas.
Nietemin is die eeufeesviering ook ‘n tyd van introspeksie en refleksie, want sonder die waardes wat deur Nelson Mandela daargestel is, loop die ANC die gevaar om ‘n rigtinglose party te word, het Zille gewaarsku.
– Volg Nuus24 op Twitter
- SAPA
