DA vra ondersoek na regse kamp
2012-02-25 07:15
Kaapstad – Die DA het die Menseregtekommissie (MRK) gevra om die aktiwiteite van ’n regse kommandokorps in Mpumalanga te ondersoek.
Die Mail&Guardian het Vrydag berig kinders van tussen 13 en 19 word glo op ’n “vervalle gasteplaas” buite Carolina opgelei om swart mense te haat.
Luidens die berig word die kinders onder meer geleer:
Benewens die inheemse bevolking van Australië, is swart mense die mees onderontwikkelde, barbaarse mense op aarde;
Hulle het glo ’n “kleiner brein” as wit mense en kan dus nie inisiatief neem en behoorlik regeer nie; en
Swart mense is die “vyand” van Suid-Afrika.
Die berig lui dat sowat 1 500 jong mense die afgelope 11 jaar die opleiding ondergaan het.
’n Kind wat in die artikel aangehaal word, het gesê: “Die opleiding het my geleer dat jy swart mense moet haat. Hulle maak almal dood met wie hul paaie kruis.”
Mmusi Maimane, DA-woordvoerder, het in ’n verklaring gesê die party gaan die MRK vra om verskeie aspekte van die kommandokorps te ondersoek.
Die party wil onder meer weet of die aktiwiteite van die kommandokorps wettig is, of enige haatmisdade gepleeg is, hoe die instelling sy wapens bekom het, hoe die jong mense gewerf is en of hulle ’n keuse daarin gehad het om gewerf te word, en of hul menseregte geskend word.
“Die tragiese plaasmoorde wat dele van ons land onlangs getref het, het mense natuurlik bang en kwaad gemaak. Rassistiese organisasies soos hierdie is egter nie die oplossing vir die bekommernisse wat Suid-Afrikaners in landelike gebiede vir hul veiligheid het nie.”
Volgens Maimane benodig die polisie ’n eenheid vir grens- en landelike veiligheid om Suid-Afrikaners wat in landelike gebiede woon, te beskerm.
“Ons het nie paramilitêre eenhede nodig wat haat vir ander mense op grond van hul velkleur kweek nie. Die DA sal dié euwel in ons land beveg.”
Franz Jooste, hoof van kommandokorps, het nie gister op navrae per SMS of e-pos gereageer nie.
– Volg Nuus24 op Twitter
- Die Burger
