DA vra leefstyl-oudits in Gauteng
2010-02-25 15:20
Johannesburg - Die DA in Gauteng het Donderdag 'n beroep op premier Nomvula Mokonyane gedoen om leefstyl-oudits op senior politici in die wetgewer te doen.
Jack Bloom het by die provinsiale debat gesê hy steun Zwelinzima Vavi, hoofsekretaris van Cosatu, se stelling dat leefstyl-oudits op politici en beamptes gedoen moet word.
"Hy is heeltemal reg dat ons nou agterdogtig moet wees oor hoe sekere mense luukse huise, motors en vakansies ver meer as wat hulle verdien kan bekostig," het Bloom gesê.
"Ek daag die premier uit om leefstyl-oudits op al haar ministers, hoofde van departemente en hul voorgangers goed te keur. Ons moet ook nabye familielede insluit wat dalk deur regeringtenders ryk geword het."
Bloom het gesê Mokonyane was stil in haar openingsrede oor korrupsie.
– Sapa