DA verloor appèl teen bevinding oor toilette
2010-09-24 12:14
Die Burger
Kaapstad - Al weer ’n vermorsing van belastingbetalersgeld wat beter aangewend kon word.
Dít was Cosatu se reaksie Donderdag hier op die DA se mislukte appèl teen ’n vroeëre bevinding van die Menseregtekommissie (MRK) oor die Makhaza-toilette.
Die MRK het Donderdag bekend gemaak dat hy die DA se appèl van die hand wys.
Die DA het vroeër geappelleer teen die bevinding waarin die MRK gelas het dat hy die oop toilette moet toebou. Die ANC-jeugliga het die klagte oor oop toilette by die kommissie ingedien.
Volgens die kommissie se vroeëre beslissing het die Stad Kaapstad die inwoners se menswaardigheid aangetas deur toilette te verskaf wat nie toegebou is nie.
Tony Ehrenreich, provinsiale sekretaris van Cosatu, het Donderdag gesê ’n klomp geld is op dié appèl vermors, wat eerder aangewend kon word om ’n oplossing vir die probleem te kry.
Dan Plato, uitvoerende burgemeester van Kaapstad, het in ’n verklaring gesê die kommissie se bevindings is onverstaanbaar. “Die bevindings erken nie die stad se pogings om daarna wel 55 oop toilette toe te bou nie – veral nadat inwoners gesê het hulle kan dit nie doen nie.”
Die ANC-jeugliga het twee keer die strukture afgebreek.
Rulleska Singh, woordvoerder vir die burgemeester, het gesê daar is geen oop toilette in Makhaza nie en die stad wag op die jeugliga om aan te dui die strukture gaan nie weer afgebreek word nie.
Luidens die verklaring sal die geld wat nodig is om die beslissing deur te voer van die nasionale regering gevra moet word. “Die stad kry sy behuisingsbegroting vir ontwikkelings soos dié van die nasionale regering. As die beslissing deurgevoer word, sal meer geld nodig wees.”
Mandla Dlamini, woordvoerder van die Wes-Kaapse ANC-taakspan, het gesê die DA moet net sy werk doen.
- Die Burger