DA verduidelik oop toilette
2010-01-22 15:51
Kaapstad - Die toilette wat sonder mure in Khayelitsha, Kaapstad, gebou is, was deel van ‘n ooreenkoms wat in 2007 met dié gemeenskap aangegaan is, het Stuart Pringle, DA-woordvoerder, Vrydag gesê.
"My grootste beswaar is dat die voorsitter van die plaaslike raad, saam met wie ek gereeld werk en wat teenwoordig was toe die ooreenkoms aangegaan is, nooit die kwessie gelug het nie,” het Pringle gesê.
Volgens hom was kritiek teen die DA oor aantygings van rassisme ‘n poging om politieke voordeel uit die situasie te trek.
Volgens die ooreenkoms sou die raad die badkamers oprig en die gemeenskap die mure bou. Die raad het glo eers gesê hulle sal gemeenskaplike badkamers oprig maar die gemeenskap het verkies om individuele toilette te bou.
Die raad het ingestem om die toilette te bou mits inwoners die strukture rondom dit oprig.
Daar is vroeër vandeesweek berig dat inwoners van die Makhaza-area van Khayelitsha hulleself met komberse moet bedek elke keer wanneer hulle die badkamer besoek omdat die toilette geen mure het nie.
Die ANC het Donderdag die DA daarvan beskuldig dat hulle geen agting het vir swartmense nie en dat hulle rassisties is.
- Sapa