DA trek klag teen jeugliga-leier terug
2010-06-15 21:08
Bloemfontein - Die Demokratiese Alliansie het Dinsdag gesê hy sal sy haatspraak-saak teen die Vrystaatse ANC-jeugligaleier Thabo Meeko terugtrek, aangesien hy berou getoon het vir sy uitlatings.
Die DA het 'n klag van haatspraak teen Meeko in die gelykheidshof aanhangig gemaak vir ongrondwetlike uitsprake wat hy in 2009 gemaak het oor die Universiteit van die Vrystaat (UV) se rektor, Jonathan Jansen. Dié uitsprake is gemaak tydens die hofverskyning van die Reitz-vier in Bloemfontein.
Die Reitz-vier verwys na die vier voormalige UV-studente van die Reitz-manskoshuis wat 'n rassistiese video gemaak het van swart werkers.
Meeko het volgens berigte destyds gesê "(Jansen) is net so 'n misdadiger soos hierdie rassistiese jong studente by die universiteit. Ons stem saam met die president van die ANC, skiet 'n misdadiger dood, en dis wat ons moet doen."
Meeko het ook gevra dat Jansen uit sy pos verwyder word.
Meeko het Dinsdag gesê dis jammer dat die ANC-jeugliga se uitspraak misinterpreteer is, en dat mense gedink het hulle wou hê Jansen moes doodgeskiet word.
"Dit was nooit die bedoeling nie."
Meeko het gesê die uitlating is gemaak in die gees wat op daardie oomblik geheers het.
"Ons wil weer sê dis baie jammer dat mense dit so geïnterpreteer het."
Die DA-parlementslid Wilmot James het Meeko se berou verwelkom.
Hy het gesê dis van uiterste belang dat die land se burgers nie sulke roekelose en onverantwoordelike beskuldigings maak soos Meeko gedoen het.
"Dit was verkeerd en ongrondwetlik."
– Volg Nuus24 op Twitter
- SAPA