DA se Combrinck nie meer burgemeester

2013-02-26 15:27

Potchefstroom –  Die DA se prof. Annette Combrinck is nie meer burgemeester van die Tlokwe-munisipaliteit wat dié stad bedien nie, berig Beeld.

Die ANC het ondanks dreigemente deur die DA dat dit om tegniese redes onwettig sou wees, vroeg Dinsdagmiddag voortgegaan om 'n mosie van wantroue teen Combrinck te bring. Dis met 30 teenoor 22 stemme tydens 'n raadsvergadering in Potchefstroom aanvaar.

Maphetle Maphetle wat einde November ook ná 'n mosie van wantroue uitgeskop is, is weer tot burgemeester verkies. Hy het Combrinck met 31 teenoor 21 stemme geklop. 

Dié wending het Combrinck se drie maande lange ampsposisie wat 'n steen des aanstoots vir die ANC was, tot 'n einde gebring. Haar verkiesing tot burgemeester in 'n ANC-beheerde munisipaliteit, het wye rimpelinge in die ANC tot op nasionale vlak veroorsaak, en selfs 'n besoek van president Jacob Zuma tot gevolg gehad.

Die ANC het vandag voortgegaan met die mosie teen Combrinck ondanks 'n hangende hooggeregshofaansoek van die DA verbandhoudend met beweerde onreëlmatighede in die ANC se poging om mag in Tlokwe te herwin.
 
– Volg Nuus24 op Twitter