DA peiling: Toeriste het goeie indruk van SA
2010-09-19 15:00
'n Toerismepeiling wat gedurende die Wêreldbeker-sokkertoernooi deur die Demokratiese Alliansie (DA) gedoen is, toon dat toeriste se indruk van Suid-Afrika veel beter is as wat voorheen vermeld is.
Altesaam 98 onderhoude is in die Wes-Kaap, Oos-Kaap, KwaZulu-Natal, Gauteng, Vrystaat en Mpumalanga met toeriste by stadions, lughawes, die Gautrein, busdienste en Fan Walks gevoer. Toeriste van elke kontinent, behalwe Afrika, is ondervra.
Die toeriste is gevra of hulle dink Suid-Afrikaners is vriendelik en 98% het gesê hulle is "baie" of "uiters" vriendelik.
26% het gesê hulle voel "baie veilig" in Suid-Afrika en 69.8% het gesê hulle voel "veilig".
Die meeste toeriste het gesê hulle kry waarde vir hul geld in Suid-Afrika. 48% het die pryse bilik gevind en 45% het gesê Suid-Afrika is goedkoper as hul eie land.
Toeriste het safari's (31.5%), sokker (23.5%) en die Suid-Afrikaanse mense (24.6%) die meeste geniet gedurende hul verblyf hier.
75% van die toeriste het egter gesê die vervoerstelsel in Suid-Afrika moet opgeknap word.
- SAPA