DA op punt om De Lille se OD in te sluk
2010-05-03 07:04
Kaapstad - Die OD staan op die punt om deur die DA ingesluk te word wanneer die OD-leier, Patricia de Lille, na verwagting binnekort saam met me. Helen Zille in een van die DA se twee topposte verkies gaan word.
Die Burger het gister van bronne in die DA se binnekring verneem dat De Lille op die party se kongres einde Julie as die DA se nasionale voorsitter benoem gaan word. Sy sal ’n lid van die DA moet word voordat sy benoem kan word.
Joe Seremane, wat tans dié pos beklee, tree vanjaar as LP uit die politiek. Hy word in Augustus 72 jaar oud.
Na verwagting sal Zille onbestrede tot DA-leier herkies word.
Nie Zille se kantoor of De Lille wou gister die gerugte bevestig nie. Zille self was nie vir kommentaar beskikbaar nie.
De Lille het gesê sedert die OD-kongres in Maart toe vier opposisiepartye – die DA, OD, Cope en UDM – die moontlikheid van ’n samewerkingsfront bespreek het, het hulle nog nie weer vergader nie. “Daar is nie gepraat oor enige posisies nie,” het De Lille gesê en bygevoeg in beginsel stem die partye wel saam, maar dat die spertyd vir terugvoering in Augustus is.
Cope se kongres is veronderstel om vandeesmaand plaas te vind.
Die DA se leier in die parlement, Athol Trollip, het sowat drie weke gelede op ’n koukusvergadering aangekondig hy is nie van plan om tot die nasionale leierskapstryd toe te tree nie.
Trollip, wat die DA se leier in die Oos-Kaap is, en Seremane het in 2007 met Zille meegeding om Tony Leon as DA-leier op te volg.
Hy het gister aan Die Burger gesê hy gaan nie om enige van die sewe nasionale leierskapposte meeding nie.
“Me. Zille doen ongelooflik goeie werk en gaan momentum aan die party verskaf om hom deur die volgende verkiesing te lei.”
James Selfe, voorsitter van die DA se federale raad, het gesê hy kan geen lig op die gerugte oor De Lille werp nie. Hy het wel gesê voordat De Lille as voorsitter van die DA benoem kan word, moet sy by die party aansluit.
Die reëlingskomitee vir die DA se kongres moet nog ’n spertyd bepaal vir benoemingslyste, maar na verwagting sluit dit ’n week voor die kongres.
Seremane het op sy beurt gesê hy sal Zille en De Lille “enige tyd” in sy kabinet verwelkom.
“Dit gaan oor watter bydrae jy tot die land kan lewer en nie om posisies nie.”
Oor sy eie aftrede uit die politiek het hy gesê dis tyd dat hy vir jonger mense plek maak. “Ek wil nie vir oom Bob (Mugabe) na-aap nie,” het hy gespot.
Die DA-kongres word na verwagting op 25 en 26 Julie in Kaapstad gehou.
- Die Burger
- Die Burger