DA-lede beseer in hysbak-ongeluk
2010-07-25 13:10
Kaapstad – Twee DA-amptenare is beseer in ‘n ongeluk in Kaapstad toe die hotel-hysbak waarin hulle gery het, drie vloere ver geval het, het paramedici Sondag gesê.
Volgens Netcare911-woordvoerder Lauren Copley was vyf DA-amptenare in die hyser in ‘n hotel in St. George-straat om ongeveer 01:30 Sondagoggend.
“Die vyf amptenare het in ‘n hysbak gestaan wat na die derde vloer van die gebou gegaan het toe dit glo drie vloere ver geval het,” het Copley gesê.
Volgens haar het die hyser se noodremme in werking getree tussen die grondvloer en ondergrondse verdiepings en het die hyser tot stilstand gekom.
Een van die amptenare, ‘n vrou wat glo in haar dertigs is, is vir pyn in haar lae-rug behandel, terwyl ‘n vrou in haar vyftigs vir rug- en nekpyn behandel is.
Hulle is albei na die Christiaan Barnard-hospitaal geneem.
Die DA-lede woon glo die party se federale kongres by.
Die voorval het plaasgevind omtrent ‘n week nadat ‘n man van Durbanville in die Kaapse middestad dood is nadat hy by ‘n hysbakskag afgeval het.
- Sapa