DA kap regering oor studentegelde

2009-12-20 19:11

Johannesburg – Die minister van verdediging en militêre veterane, Lindiwe Sisulu, moet ondersoek instel in die feit dat die regering nie millitêre studente se gelde betaal nie, het die DA Sondag gesê.

David Maynier van die DA het gesê dat dit ‘n “absolute skande” is dat studente van die Militêre Akademie, wat by die Universiteit van Stellenbosch gegradueer het, rekeninge vir uitstaande gelde, eerder as graad-sertifikate, by hul gradeplegtigheid verlede week ontvang het.

Dit was glo omdat die weermag nie uitstaande studentegelde van R1,5 miljoen aan die universiteit oorbetaal het nie.

“Die militêre studente sal glo hul grade ontvang sodra die weermag die uitstaande gelde aan die Universiteit van Stellenbosch oorbetaal,” het Maynier gesê.

“Die feit bly staan dat die studente en hul ouers onnodige vernedering en teleurstelling moes deurmaak omdat die onderduimse weermag-burokrasie nie die rekeninge betyds kon betaal nie,” het hy gesê.

Maynier het ‘n versoek op Sisulu gedoen om in te tree en om te verseker dat die uitstaande gelde oorgedra word en dat ‘n ondersoek geloods word om uit te vind wie verantwoordelik is.

Hy het ook gevra dat dissiplinêre stappe geneem word teen diegene wat verantwoordelik is en dat sisteme in plek gesit word om te verseker dat dit nooit weer gebeur nie.

- Sapa