'DA kan die land voor 2020 regeer'
2011-12-12 07:35
Kaapstad – As die DA die tekens en tendense reg lees en homself in die nierassige sentrum van die politieke spektrum vestig, sal hy Suid-Afrika voor die einde van die dekade regeer.
Só het Helen Zille, DA-leier en Wes-Kaapse premier, Sondag in die party se weeklikse aanlyn-nuusbrief, SA Today, geskryf.
Zille het tot dié gevolgtrekking gekom nadat sy die uitslae van die tussenverkiesings in Thaba Chweu in Mpumalanga, Thembelihle in die Noord-Kaap en Qwa-Qwa in die Vrystaat ontleed het.
Ses maande gelede het die ANC al drie dié wyke maklik gewen. Nou is drie ander partye daar in beheer.
Die DA het wyk 10 in Thaba Chweu 52,6% van die stemme gewen, teenoor die ANC se 47,3%.
“Die stempersentasie was byna dieselfde in die tussenverkiesing as in die plaaslike regeringsverkiesing in Mei vanjaar. Dit beteken die afname in steun vir veral die ANC is betekenisvol. Dit beteken mense wat in Mei vir die ANC gestem het, het verlede week vir die DA gestem,” lui Zille se brief.
In Thembelihle in Hopetown, het ’n onafhanklike kandidaat stof in die oë van die ANC geskop, terwyl die Dikwankwetla party koning gekraai het in die wyk in Qwa-Qwa. Die ANC het nie hier ’n kandidaat gestel nie.
Volgens Zille sal dié tussenverkiesings die keerpunt in die Suid-Afrikaanse politiek simboliseer.
Sy het gesê al meer stoere ANC-ondersteuners raak toenemend gemaklik daarmee om vir opposisiepartye te stem.
– Volg Nuus24 op Twitter
- Die Burger