DA-hoë se seun gekaap

2012-10-03 09:35

Durban – Dianne Kohler Barnard, DA-woordvoerder oor die polisie, se seun is Dinsdagaand gekaap terwyl hy vir sy ma buite haar huis in Morningside gewag het.

Drie gewapende mans het 'n vuurwapen teen Peter Barnard se kop gedruk en hom uit sy motor getrek terwyl sy ma besig was om die deure van haar huis te sluit.

Kohler Barnard sê 'n rooi BMW het agter haar seun se silwer Audi A5 stilgehou en drie gewapende mans het uitgeklim.

"Dank God hy is nie geskiet nie. Hulle het hom uit die motor getrek, hom in die erf gestoot en die hek gesluit."

Peter het gesê hy het sy samewerking gegee toe hy die vuurwapen gesien het. Hy is ongedeerd.

Die twee motors het daarna weggejaag.

Kohler Barnard het kort na die voorval op Twitter geskryf: "My seun is pas buite my huis gekaap... silwer Audi A5 - 4 gewapende mans. Opsporingstoestel in die motor. Morningside, Durban met rooi BMW kontak my – nou."

Kohler Barnard sê 'n opsporingsmaatskappy het die motor sowat 8 km verder in 'n cul-de-sac gevind.

Sy sê sy glo die kapers het die motor daar gelos om te kyk of dit 'n opsporingstoestel het.

– The Star. 

– Volg Nuus24 op Twitter.