DA: Zuma moet Mogoeng-benoeming terugtrek
2011-09-05 14:26
Kaapstad – Die DA gaan pres. Jacob Zuma vra om Mogoeng Mogoeng as sy benoeming vir hoofregter terug te trek, het die opposisieparty se leier, Helen Zille, Maandag gesê.
Zille het verslaggewers in Kaapstad vertel sy gaan vir Zuma sê dat Mogoeng nie die nodige vaardighede het om Suid-Afrika se hoofregter te wees nie.
Sy beplan om die president Dinsdag by ‘n vergadering in Pretoria te nader.
“Dit is ons opregte aanbeveling dat pres. Zuma... sy benoeming van regter Mogoeng terugtrek en ander kandidate oorweeg,” het Zille gesê.
Mogoeng is onlangs deur Zuma vir die pos benoem nadat die voormalige hoofregter, Sandile Ngcobo, afgetree het.
Die Regterlike Dienskommissie (RDK) het Mogoeng die afgelope naweek ondervra oor sy geskiktheid vir die pos.
Die meerderheid van die RDK se lede het in ’n geheime stemming hul steun aan Mogoeng toegesê.
Die RDK moet nog ‘n amptelike besluit oor die saak aankondig.
Volg Nuus24 op Twitter.
- SAPA