DA gaan LP aankla wat baie reis
2010-10-15 08:16
Kaapstad - Dr. Manie van Dyk, die DA-LP wat die parlement in die laaste boekjaar derduisende rande uit die sak gejaag het met padreis-eise, gaan deur dié party aangekla word.
Hy gaan daarvan aangekla word dat hy die party se federale grondwet oortree het en die DA in oneer gebring het deur na bewering dié eise in te stel.
Só het Hendrik Schmidt, DA-LP en die voorsitter van die party se federale regskommissie, Donderdag by navraag aangekondig.
Schmidt het gesê ofskoon die klagstaat nog opgetrek moet word, word Van Dyk daarvan beskuldig dat sy optrede strydig was met wat van ’n lid van die party verwag word.
Van Dyk, wat Donderdag hieroor ingelig is, wou nie kommentaar lewer oor die klag nie.
“Ek weet nie wat hulle gaan doen nie. Vra maar vir die voorsitter van die regskommissie,” het hy geantwoord.
In die laaste boekjaar moes die parlement meer as R6 miljoen opdok vir padreis-eise.
Van Dyk, DA-woordvoerder oor openbare ondernemings, het in die tersaaklike boekjaar meer as R275 500 geëis toe hy per motor tussen sy kiesafdeling in Pretoria en die parlement gereis het.
Dit het ’n bykomende maandelikse inkomste van bykans R23 000 vir Van Dyk beteken.
Ebrahim Sulliman, ANC-LP van die Vrystaat, het R242 000 geëis en Jan Gunda, OD-LP van die Noord-Kaap, R134 000.
Eise word glo direk by die parlement ingedien, ’n proses wat Patricia de Lille, OD-leier, wat die onthulling verlede maand gemaak het, wil hê moet verander.
Die handboek vir lede bepaal dat LP’s mag kies tussen ’n lug-, pad- of treinreis. Die parlement vergoed hulle net vir motor- en treinvervoer.
Schmidt het gesê die regskommissie het nog nooit so ’n saak aangehoor van beweerde misbruik van voordele nie, so dit is moeilik om moontlike strawwe te stipuleer.
Volgens hom maak die party se grondwet egter voorsiening vir verskeie strawwe waar ’n lid die grondwet oortree.
Moontlike strawwe sluit in ’n waarskuwing, boete, opskorting van posisie wat die persoon in die party beklee, tot die beëindiging van sy lidmaatskap.
“Dit sal alles afhang van die omstandighede, die motief en die bedrag ter sprake,” het Schmidt gesê.
Hy het bygevoeg ’n paneel van vyf sal eersdaags besluit op ’n datum vir die verhoor.
Die parlement sowel as die ANC het reeds aangedui dat hulle kennis geneem het van die eise, maar dat LP’s geen kode oortree het nie.
- Die Burger