DA, VF+ verwelkom Malema-beslissing
2012-02-05 19:02
Johannesburg – Die DA en die VF Plus se jeugliggame en Afriforum het Sondag die ANC se bekragtiging van Julius Malema se skorsing as leier van die Jeugliga verwelkom.
“Ons hoop dit dui op die einde van ‘n tydperk van sensasiewekkende boelie-politiek wat die aandag op een individu gevestig het, ten koste van werklike en substantiewe uitdagings van die jeug,” het die DA se Jeugleier, Makashule Gana, in ‘n verklaring gesê.
Die Vryheidsfront Plus Jeug het gesê die ANC-Jeugligaleier en sy woordvoerder, Floyd Shivambu, het Suid-Afrika se reputasie skade berokken.
“Met sy kommentaar oor nasionalisering het hy buitelandse beleggers afgeskrik, terwyl sy rasse-houdings verhoudings in die land skade aangedoen het,” het Wouter Wessels, die VF Plus se Jeugleier, in ‘n verklaring gesê.
Kallie Kriel, uitvoerende hoof van Afriforum, het gesê die politieke landskap is beter daaraan toe sonder Malema.
“Malema was vir die afgelope twee jaar die mees polariserende faktor in die land en sonder hom op die toneel sal dit veel makliker wees om gemeenskaplike erkenning en respek tussen gemeenskappe te bevorder,” het hy in ‘n verklaring gesê.
Die ANC se nasionale appèlkomitee het Saterdag aangekondig dat pogings deur Malema, Shivambu en vier ander beamptes van die ANC-Jeugliga om hul skorsings te laat ophef, verwerp is. Hulle is in November verlede jaar daaraan skuldig bevind dat hulle die ANC in oneer gebring en verdeeldheid binne die party gesaai het.
- Volg Nuus24 op Twitter
- SAPA