DA: Regering moet ingryp by waterwese
2010-07-16 06:08
Wes-Kaap - Die regering moet optree teen die geskorste direkteur-generaal (DG) van waterwese en verskeie senior amptenare wat vir onreëlmatige uitgawes van meer as R1 miljard verantwoordelik was.
Só het die DA Donderdg gesê nadat die ouditeur-generaal (OG) in ’n verdoemende verslag die bestuur van dié departement skerp gekritiseer het weens ’n “gebrek aan leierskap” en die vermorsing van belastingbetalers se geld.
Die OG het ook sterk optrede bepleit en gesê die kultuur van wanadministrasie in die departement moet omgekeer word.
Die OG het bevind Pam Yako (hy het haar nie by naam genoem nie) en senior amptenare in die departement was sedert 2008 by geldelike wanbestuur van meer as R1 miljard betrokke.
Yako is in Julie verlede jaar as DG geskors hangende ’n ondersoek na beweerde onreëlmatighede met die verlenging van kontrakte, die afwyking van die departementele verskaffingsbeleid en die betaling van diensverskaffers sonder dat kontrakte onderteken was.
In sy verslag het die OG bevind:
* ’n Kontrak vir inligtingstegnologie-dienste ter waarde van R180 miljoen is vir ’n tydperk van 36 maande met ’n diensverskaffer gesluit. Dié kontrak is verskeie kere onregmatig verleng, wat die departement altesaam R1,056miljard, oftewel 587% meer as die oorspronklike kontrak, uit die sak gejaag het.
* Die departement het in September 2008 ook R289902 aan ’n diensverskaffer vir veranderingsbestuur betaal voordat ’n kontrak van R2,5 miljoen met die diensverskaffer onderteken is. Dié diensverskaffer en Yako is vriende en mededirekteurs van twee onverwante maatskappye.
Die OG het gesê aangesien wetgewing en regulasies met die aanstellingsprosedure van die diensverskaffer oortree is, moet alle betalings – wat R1,87 miljoen beloop – as onreëlmatig beskou word.
* ’n Kontrak van R85?miljoen is deur die DG aan drie reisagente toegeken wat nie aan die tendervereistes voldoen het nie, hoewel een van die tenderaars aan al die vereistes voldoen het.
Die OG het aanbeveel dat drastiese stappe teen die skuldiges gedoen moet word om die departement skoon te maak en die kultuur van wanadministrasie om te keer.
Sputnik Ratau, woordvoerder van Buyelwa Sonjica, minister van waterwese, het gesê die minister neem kennis van die OG se verslag.
“Dit is belangrik dat die minister nie haar stappe beperk tot die DG nie, maar dit uitbrei na alle amptenare wat by die onreëlmatige uitgawes betrokke was,” het Gareth Morgan, DA-LP, gesê.
- Die Burger