DA: Regegering spandeer R1 miljard op reis
2010-04-29 16:50
Kaapstad - Die DA het Donderdag die regering gekritiseer nadat die staat gedurende die afgelope finansiële jaar oor die R1 miljard aan internasionale reiskostes spandeer het.
Ná ’n ondersoek het die DA gevind dat reiskostes verbonde aan internasionale toere deur ministers, adjunk-ministers en amptenare van die nasionale departement tot sowat R1 miljard gestyg het, het DA-woordvoerder Lindiwe Mazibuko gesê.
Reiskostes van alle nasionale departemente, te midde van die ekonomiese resessie waarin die land homself bevind, het met sowat 20% toegeneem, het sy gesê.
Die DA het, met behulp van data van departementele verslae, uitgewerk dat die totale kostes verbonde aan amptelike oorsese besoeke vanaf R823 miljoen in 2007/08 tot R978 miljoen in 2008/09 toegeneem het.
Nasionale ministers het gedurende die waarnemingstydperk nie minder nie as 474 oorsese besoeke afgelê terwyl adjunk-ministers sowat 169 besoeke onderneem het.
Vanuit die 31 departemente wat onder die vergrootglas geplaas is, het 21 se reiskostes in 2008/09 se finansiële jaar gestyg.
“Reiskostes is natuurlik deel van die bestuur van die regering, maar ons glo daar is net te veel gevalle waar ministers geleenthede bywoon waaruit die gewone Suid-Afrikaner nie baie voordeel uit trek nie," het Mazibuko gesê.
"Dit is net moeilik om in te sien hoe ‘n besoek aan Mali vir die inhuldiging van die biblioteek van Timboektoe deur die minister van verdediging byvoorbeeld ‘n prioriteit kan wees in ‘n tyd wat die regering elke dag massiewe sosio-ekonomiese uitdagings in die gesig staar.”
"Wat nog meer onaanvaarbaar is, is dat ons daarin slaag om R1 miljard aan reiskostes kan spandeer.”
"Ons navorsing het ook gevind dat baie van die ministers gedurende 2008/09 vir ‘n verlengde tydperk buite die land aangebly het.”
"Waar vind die ministers die tyd om hulle onderskeie departemente te bestuur wanneer die meeste ‘n kwart van die jaar in die buiteland is?” het Mazibuko gesê.
-Sapa