DA: Red skole van vakbond
2009-08-21 13:42
Kaapstad – Die DA het ‘n beroep gedoen op die regering om publieke skole uit wat hulle bestempel as "die wurggreep van die Suid-Afrikaanse Demokratiese Onderwysersunie (Sadou)" te red.
Sadou verteenwoordig meer as die helfte van die land se onderwysers. [Die unie] probeer konstant om enige poging tot verbetering te ondermyn,” het Junita Kloppers-Lourens, DA se skaduminister van basiese onderwys, Vrydag gesê.
Sy sê dat Sadou optogte reël en geld en voordele eis, maar niks doen “om onderwysers wat slap lê te kry om betyds by die werk te wees of hulle werk te doen nie”.
Die DA-woordvoerder sê ook die vereniging se benadering skep ‘n “giftige ingesteldheid” wat apatiese gedrag, middelmatigheid en verwaarlosing die oorhand gee.
“Die departement van onderwys behoort alles moontlik te doen om dié mag te breek,” het Kloppers-Lourens gesê.
Die regering behoort Sadou verantwoordelik te hou vir finansiële skade tydens optogte, ‘n plan van aksie te eis wat onderwysers se bywoning monitor en streng te reageer op onderwysers wat hul gedragskode breek.
Daar kan nie toegelaat word dat Sadou opkom vir onderwysers wat nie hul werk doen nie, het die DA woordvoerder gesê.
- Sapa