DA, Naspers konkel, sê ANC
2012-03-12 07:05
Kaapstad – Die mediagroep Naspers se transaksie met die DA-beheerde Kaapstad-munisipaliteit vir ’n stuk grond is “verdag, onheilspellend en laat die oë rek”.
Dr. Mathole Motshekga, ANC-hoofsweep in die parlement, het gesê hy gaan die openbare beskermer (OB) vandeesweek vra om dié beweerde transaksie van R106 miljoen vir die stuk grond oorkant die Naspers-gebou in die middestad te ondersoek.
Dié grond is glo deur ’n onafhanklike eiendom-ontleder vir nie meer nie as R50 miljoen gewaardeer.
Motshekga het gesê ’n dringende ondersoek moet daarna gedoen word.
Luidens ’n berig wat Vrydag in die Cape Times verskyn het, gaan die stadsraad ’n deel van die stuk grond, wat as parkeergebied gebruik word, by Naspers koop om die Kaapstadse Internasionale Konferensiesentrum (Kiks) te kan uitbrei. Dit sal ’n ondergrondse parkeergebied insluit.
“Dit is onregverdig en onaanvaarbaar dat die publiek meer as dubbel die waarde vir die grond moet betaal,” het Motshekga verklaar.
“Die waarde bly uiters oordrewe.”
Ian Neilson, onderburgemeester van Kaapstad, het teruggekap en gesê ’n OB-versoek sou die “ergste graad van politieke opportunisme” wees.
“Die grond sal gebruik word vir die broodnodige uitbreiding van die kapasiteit by die Kiks. Die beleggings sal bydra tot Kaapstad se verdere aansien as wêreldleiersfiguur in konferensiebestemmings.”
Motshekga het gesê die transaksie vlek ’n “interessante sameswering” tussen die DA en Naspers oop om belastingbetalers in te doen.
Neilson het gesê dit is bloot die minister van openbare ondernemings se mislukking om jaar ná jaar oor die beskikbaarheid van Customs-huis vir die uitbreiding van die Kiks te onderhandel wat daartoe gelei het dat die stad ’n alternatiewe perseel moes koop.
Carel Snyman, finansiële direkteur van Naspers, het by navraag gesê die maatskappy gaan nie betrokke raak by die bakleiery tussen die ANC en die DA nie.
“Ons het ’n stuk grond gehad. Ons wou dit al ontwikkel, maar is deur die Kiks genader daarvoor. Niemand is in ’n transaksie gedwing nie,” het Snyman gesê.
– Volg Nuus24 op Twitter
- Die Burger
