DA-LP op pos ná van verkragting aangekla is
2010-07-17 10:15
Kaapstad. – Die DA het bevestig dat ’n parlementslid van die party wat van verkragting aangekla word, Maandag by die heropening van die parlement op sy pos sal wees.
Die 29-jarige man word daarvan beskuldig dat hy in Mei ’n meisie (17) by sy huis in die parlementêre dorpie Pelican Park in Goodwood verkrag het.
Hy het gister vir die tweede keer in die Wynbergse landdroshof verskyn nadat hy op 8 Junie op borgtog van R500 vrygelaat is. Hy het nog nie gepleit nie.
James Selfe, voorsitter van die DA se federale raad, sê die party beoog in dié stadium geen stappe teen die parlementslid nie.
“Die DA beskou verkragting in ’n baie ernstige lig, maar tans is dit slegs ’n bewering. In dié stadium het geen inligting nog vorendag gekom wat optrede teen hom sou regverdig nie.
“Hy verskaf ’n ander weergawe as die klaagster. Die beginsel dat ’n mens onskuldig is totdat jou skuld bewys is, geld dus.”
Die aanklag spruit uit ’n voorval op 30 Mei by die man se huis toe die meisie en ’n vriend glo die aand daar vleis gebraai het.
Die parlementslid is gister deur vriende by die hof ondersteun. Die verrigtinge is tot 6 September uitgestel.
Hy was gister vol vertroue dat sy onskuld bewys sal word, maar wou nie oor die besonderhede van die klag teen hom uitwei nie.
“Ek glo in die Suid-Afrikaanse regstelsel en die Grondwet. Geregtigheid sal seëvier,” het hy gesê.
- Beeld