DA, ANC in bekgeveg oor plaaswerkerstaking

2012-11-17 09:50

Kaapstad – Die Demokratiese Alliansie en die ANC blameer mekaar vir aanhitsing van spanning in plaasgemeenskappe in die Wes-Kaap, berig Eyewitness News.

Gewelddadige stakings vir hoër lone het verlede week in De Doorns losgebars en na 16 plaasgemeenskappe versprei. 'n 28-jarige plaaswerker het in die staking gesterf.

Die DA het gesê hy het 'n pamflet in die Theewaterskloof-gebied gevind, wat daarop dui dat die ANC aangebied het om mense te betaal om aan die betogings deel te neem.

"Die uitreiking van die pamflette bevestig ons vermoedens dat mense betaal is om te betoog," het Liza Albrecht, provinsiale woordvoerder van die DA, gesê.

Die ANC het op sy beurt uitgevaar teen die opposisie en het die DA daarvan beskuldig dat hy leuens versprei.

"Die DA het nog altyd probeer om in die Wes-Kaap 'n smeerveldtog teen die ANC te voer," het Songezo Mjongile, die ANC se provinsiale sekretaris, gesê.

Intussen het sowat 300 plaaswerkers in Wolseley Vrydag teruggekeer werk toe.

Die werkers eis 'n daaglikse loon van R150.

– Lees meer hier

– Volg Nuus24 op Twitter