Croeser 23 jaar tronkstraf opgelê
2012-01-17 21:02
Pietermaritzburg – ‘n Voormalige lid van ‘n honde-eenheid van die polisie, Morné Croeser, is in die Hooggeregshof in Pietermaritzburg 23 jaar gevangenisstraf opgelê vir die moord op sy vrou, Erika.
Croeser (34) is Maandag skuldig bevind aan die misdaad in 2010. Sy vrou is 14 keer gesteek.
Regter Esther Steyn het gesê Erika se dogters – onderskeidelik sewe en vier jaar oud – is ontneem van haar lewe, drome en verwagtinge.
Erika se familie en vriende is ook beroof van ‘n suster, dogter en maat.
Irene Neyt, aanklaer, het gevra Croeser moet lewenslange tronkstraf opgelê word. Sy het gesê hy het die situasie geskep waarin sy vrou brutaal vermoor is nadat sy van ‘n kroeg af huis toe gekeer het.
Croeser was onstabiel, het geen berou getoon nie en het nie die hof in sy vertroue geneem nie, het Neyt gesê.
Sy het gesê dit is onwaarskynlik dat hy gerehabiliteer kan word.
Murray Pitman, vir die verdediging, het gesê Croeser hou vol hy is onskuldig en dat sy vrou deur ‘n inbreker doodgesteek is.
Croeser het beweer sy hande en arms is gesny toe hy met die inbreker baklei het. Volgens hom het die inbreker hom in die maag gesteek en Erika doodgesteek.
Die staat het gesê Croeser het homself in die maag gesteek om sy bewerings te steun.
Pitman het gevra vir verlof om appèl aan te teken, maar dit is geweier.
- Volg Nuus24 op Twitter
- SAPA