Coyne se geheim
2010-08-27 16:38
Kaapstad - Die raaisel waarom die aktrise Fiona Coyne nie meer vir die lewe kans gesien het nie, kan dalk deur ’n Kaapse advokaat ontsluit word, berig Huisgenoot.
In ‘n artikel in Huisgenoot word vertel hoe dié advokaat by haar roudiens bitterlik gehuil het en toe hy uitstap, het dit gelyk of hy inmekaar gaan sak.
Al wat die gebroke Richard Goodman later kon sê, is: “Ek het haar lief. Ek het haar innig lief,” maar hy was te hartseer om verder te praat.
Volgens Huisgenoot het min van Coyne se naasbestaandes van Goodman geweet - haar ma en broers het van hom geweet, maar glo nie geken nie.
‘n Vertroueling van Coyne het aan Huisgenoot vertel hoe haar lewe die afgelope vier maande dramaties verander het.
Eers het sy met hart en siel by ’n liefdadigheidsprojek in Zimbabwe betrokke geraak en selfs haar huis in Vishoek op die mark gesit om soontoe te trek. Kort daarna het Coyne, wat 18 maande terug van Willie Fritz geskei het, glo vir Goodman ontmoet.
“Ek sal nooit vergeet hoe opgewonde sy was toe sy uit die bloute verlief raak nie,” het dié vriendin, Lesley-Anne Mulder, aan Huisgenoot gesê.
“Sy het vir my gesê sy het nog nooit so intens oor enige man gevoel nie.”
Maar, volgens Mulder was Goodman gekant teen Coyne se betrokkenheid by die opheffingswerk in Zimbabwe. In ’n stadium wou hy hê sy moes tussen hom en dié werk kies.
“Dit het stil van sy kant geraak en toe sy nie van hom hoor nie, was dit soos ’n mat wat onder haar uitgetrek word. So vinnig soos die liefde gekom het, was dit weer weg.”
Lees meer by Huisgenoot.com.
- Huisgenoot