Cosatu-betogers bring Pta-middestad tot stilstand

2013-02-11 11:51

Pretoria – 'n Konvooi van Cosatu-betogers het verkeer in die Pretoriase middestad Maandag tot stilstand gebring in 'n optog oor die e-tolstelsel.

Sowat 100 motors het Marabastad aan die buitewyke van Pretoria voor 10:00 verlaat en in die rigting van die middestad gery.

Die betogers het by die kantore van die departement van vervoer uit hul motors geklim en begin sing en dans. Sommige het vuvuzelas geblaas en plakkate rondgeswaai.

Die optog het by die ou Putco-busdepot begin en beweeg in die rigting van die N1 na Johannesburg.

Dumisani Dakile, provinsiale sekretaris van Cosatu, het gesê die optog sal in ander provinsies ook plaasvind, om te verseker dat dit 'n "nasionale kwessie" word.

Die tweede optog sal op 25 Februarige gehou word – dieselfde dag as die opening van die Gautengse wetgewer, terwyl die derde optog op 7 Maart sal plaasvind.

Die Pretoriase hooggeregshof het Vrydag die Bondgenootskap teen Stedelike Tol (Outa) se verlof tot appèl toegestaan teen 'n vorige uitspraak en ook die kwessies van die hofkoste na die appèlhof verwys.

Outa het op 13 Desember 2012 aansoek gedoen om teen 'n uitspraak te appeller nadat die hooggeregshof sy aansoek om die tolstelsel te hersien, van die hand gewys het.
       
– Volg Nuus24 op Twitter

- SAPA