'Cosatu bankvas agter Zuma'
2011-12-03 23:05
Johannesburg – Alle groepe binne die vakverbond Cosatu staan bankvas agter pres. Jacob Zuma tot verdere kennisgewing. Só sê die Cosatu-president Sidumo Dlamini volgens die Sunday Times.
Dlamini het gesê dat slegs die federasie se nasionale kongres volgende jaar dié stand van sake kan beïnvloed.
Hy het ook vir eenheid binne die federasie gevra, en gesê verdeeldheid onder die onderskeie groepe veroorsaak verwarring by lede.
Dié uitlatings volg ná aanduidings dat Cosatu intern nie gelukkig is met Zuma se leierskapstyl nie. Daar is glo ook ontevredenheid oor die president se oënskynlike versuim om beloftes wat hy tydens sy presidensiële veldtog aan die vakverbond gemaak het, gestand te doen.
Dlamini het egter benadruk dat dié ontevredenheid nie beteken dat die federasie nie meer die huidige ANC-leierskap ondersteun nie.
"Daar was dalk 'n probleem [oor] of Cosatu die huidige ANC-leierskap wat by Polokwane gekies is, ondersteun... Hoe kan daar verwarring wees wanneer daar reeds 'n standpunt ingeneem is... om die leierskap wat daar gekies is, te ondersteun?" het hy gevra.
– Volg Nuus24 op Twitter.
- SAPA