Cosatu, Numsa dreig met staking oor begroting
2010-02-19 08:07
Johannesburg - Werkers het gister gedreig met ’n massastaking teen die begroting van Pravin Gordhan, minister van finansies.
Irvin Jim, hoofsekretaris van die metaalwerkersunie Numsa, asook Zwelinzima Vavi, hoofsekretaris van Cosatu, dreig albei met ’n staking voor Oktober. Hulle het nie gesê of dit dalk ten tyde van die Wêreldbeker-sokkertoernooi in Junie en Julie kan gebeur nie.
“Ons gaan die houe nie meer terughou nie. Die handskoene is af en die wittebrood is verby,” het Vavi gedreig.
Volgens Cosatu het die ANC-regering “eensydige gewoontes” en ignoreer hulle besluite oor die ekonomie waarop Cosatu, die ANC en die SAKP reeds in Oktober verlede jaar tydens die alliansieberaad ooreengekom het.
Cosatu reken sy 2 miljoen lede en dié van ander vakbondfederasies kan voor Oktober met ’n landwye staking teen werkloosheid en makro-ekonomiese beleid begin.
“Moet ons wag op die minister (Gordhan) om sy mening eers volgende jaar te verander? Nee, ons kan nie,” het Vavi gesê.
Volgens hom staan die werklike werkloosheidsyfer op 32% en sal die vakverbond die regering op sy tone en verantwoordbaar hou.
Vavi meen samesprekings met alliansievennote en die regering is nie die enigste oplossing nie.
“Dit blyk as ons vreedsaam (oor ekonomiese beleid) gesels, kies mense wat hulle wil toepas.
“Dié gesels onder gentlemen werk nie.”
Cosatu is teleurgesteld oor Gordhan se aankondiging dat die Reserwebank se inflasieteikens steeds tussen 3% en 6% is.
“Die minister weet daar is nie konsensus oor inflasieteikens nie,” het Vavi gesê.
Hy meen Gordhan is deur amptenare beïnvloed wat in die Mbeki-regering gedien het en neo-liberalistiese beleid steeds voortsit. “Regeringsprosesse wag nie op ons nie en die minister is aan die galop.”
Vavi het erken die alliansie se taakspan vir makro-ekonomiese beleid het nog nie vergader sedert daar verlede jaar besluit is om dit tot stand te bring nie.
“Die minister is gelos om self te besluit wat goed en sleg is (vir die begroting),” het hy gesê.
Vavi is ook krities omdat die ANC volgens hom gewankel het deur nie te verseker die Reserwebank se mandaat word vergroot en inflasieteikens hersien nie.
Cosatu wil dringend met die minister en die alliansievennote oor ekonomiese beleid vergader.
Die volgende alliansievergadering is vir einde Maart geskeduleer.
- Beeld