Cosatu: Betogings sál werk
2013-02-11 14:40
Pretoria – Die rits betogings teen die e-tolstelsel sal uiteindelik verseker dat dié omstrede program geskrap word, het Dumisani Dakile, provinsiale sekretaris van Cosatu in Gauteng, Maandag gesê.
Hy het aan betogers in Pretoria gesê die betoging sal, ten spyte van die swak bywoning, ‘n duidelike boodskap van weerstand aan die regering stuur.
Die betoging het, ondanks die feit dat dit nie groot aftrek gehad het nie, groot ontwrigting veroorsaak.
“Hierdie aksie gaan baie doeltreffend wees. Hier is ons nie bekommerd oor kwantiteit nie, maar kwaliteit,” het Dakile gesê.
“Ons gaan baie stadig ry. Daar is vandag geen haas in Suid-Afrika nie. Die hoofteiken vandag is die N4, R21 en die N1,” het hy gesê.
Phutas Tseki, provinsiale voorsitter van die Congress of SA Trade Unions (Cosatu), het gesê verdere betogings sal in die toekoms in die provinsie gehou word.
“Ons sê vir die regering dat ons, die werkers, nie gelukkig is nie. Die ontwikkeling van die transformasie-agenda verloop anders as wat ons in 1994 verwag het,” het hy gesê.
“Ons het die siening gehad dat ons gratis onderwys sou hê [en] vry op die paaie sou kon beweeg. Die regering wil nou sekere dele van die samelewing van hierdie paaie uitsluit.”
Tseki het bygevoeg Cosatu hoop dat die departement van vervoer “sy besluit sal herroep en dit wat hulle sê, sal hersien”.
Die betoging, wat deur verskeie polisie-eenhede vergesel is, het erge verkeersopeenhopings in Pretoria veroorsaak. Betogers het besige kruisings, soos die hoek van Nelson Mandela-rylaan en Francis Baard-straat, versper.
– Volg Nuus24 op Twitter
- SAPA
