Cosas dreig met geweld oor eise by skool
2011-10-22 08:17
Kaapstad – Terwyl leerders van die Sekondêre Skool Chris Hani gister veiligheid by hul skool geëis het, het ’n leier van die Congress of South African Students (Cosas) met gewelddadige optrede gedreig as daar nie aan dié eis voldoen word nie.
Sowat 200 leerders van dié skool in Khayelitsha het omstreeks 13:00 voor die Wes-Kaapse parlement in Waalstraat hier byeengekom.
Hulle het betoog nadat Bambanani-wagte glo verlede maand ’n leerder, Malibongwe Melani (18), aangerand het.
Malibongwe het ’n rugbesering opgedoen.
Hy het ook beweer die skoolhoof, Madoda Mahlutshana, het opdrag gegee dat hy aangeval word en niks gedoen om die aanval te keer nie.
Die Wes-Kaapse onderwysdepartement (WKOD) het vroeër ná ’n ondersoek bevind dat hy nie teen Mahlutshana gaan optree nie.
Die leerders eis Mahlutshana se ontslag, dat die WKOD nog ’n ondersoek doen en stappe om hulle te beveilig.
Die provinsiale sekretaris van Cosas, Samkelo Mqombati – geklee in ’n swart baret en ’n baadjie met die embleem van die ANC-jeugliga – het hulle met ’n megafoon aangehits.
Hy het gesê as die WKOD nie binne sewe dae op hul griewe antwoord nie, sal hulle weer na die wetgewer opruk. “As dit beteken ons moet radikaal en gewelddadig optree, sal ons dit doen,” het hy aan die juigende leerders gesê.
Donald Grant, Wes-Kaapse minister van onderwys, was gistermiddag in ’n komiteevergadering om die departement se jaarverslag te bespreek.
Sy woordvoerder, Bronagh Casey, het gesê hy kon gevolglik nie oor die leerders se griewe kommentaar lewer nie.
Grant het Donderdag op ’n vergadering van die parlement gesê Mahlutshana is op spesiale verlof geplaas “om kalmte terug na die skool te bring”.
Mahlutshana was egter vandeesweek weer op sy pos.
Mcebisi Skwatsha, ANC-LPP, het gesê die ouers en leerders wil hom nie terug by die skool hê nie.
Grant het geantwoord: “Ons hou die skoolhoof fyn dop.”
Intussen het die WKOD planne beraam sodat Malibongwe sy matriekeksamen kan aflê, het Casey gesê.
– Volg Nuus24 op Twitter.
- Die Burger