Cope wil Shilowa skors oor bewerings van wanbesteding
2010-11-14 11:05
Llewellyn Prince en Jan-Jan Joubert
Rapport
Die leierskap-oorlog in Cope behoort môre ’n nuwe laagtepunt te bereik wanneer die party se onderleier, Mbhazima Shilowa, deur sy teenstanders geskors word weens beweerde wanbesteding.
Dit kom nadat Shilowa-ondersteuners, wat hom bo die partyleier, Mosiuoa Lekota, verkies die afgelope week klagte van korrupsie en bedrog teen Lekota ingedien het.
Rapport het betroubaar verneem Cope se topstruktuur vergader Maandag en die Lekota-groep, wat die struktuur oorheers en Lekota as leier bo Shilowa steun, wil Shilowa sy sittingsreg as LP ontneem.
Die verwagting is dat Shilowa met mag en mening sal terugbaklei omdat hy meen sy teenstanders se interpretasie dat ’n ouditverslag toon geld is wanbestee onder sy toesig as parlementêre sweep, is verkeerd.
Shilowa-ondersteuners meen hul kandidaat het meer steun as Lekota in Cope-strukture en sal Lekota klop in ’n leierskapstemming by die Cope-kongres aanstaande maand. Hy moet dus net tot dan vasbyt.
Die groep Cope-lede wat strafregtelike klagte teen Lekota ingedien het, wil hê hy moet ook vir beweerde belastingontduiking ondersoek word. Die “staande komitee van Cope se jeugbeweging” het Donderdag aan Rapport gesê hulle gaan binnekort ’n brief hieroor aan die Suid-Afrikaanse Inkomstediens stuur.
Die groep bestaan uit leiers van Cope se jeugbeweging, wat tans onder kuratorskap is, soos Anele Mda, die voorsitter, Malusi Booi, sekretaris-generaal, en Sthembiso Khanyile, adjunk-sekretaris-generaal.
Die aangeklaagdes is Lekota en drie Cope-LP’s: Dennis Bloem, Juli Killian en Hilda Ndude. Die aanklagte spruit uit sowat R5 miljoen wat Bloem en Killian volgens Khanyile na bewering sonder magtiging uit die parlement na die Cope-hoofkwartier oorgedra het.
“Ons weet van dié R5 miljoen is gebruik om Lekota se salaris te betaal. Geen belasting is egter op sy salaris betaal nie,” het Khanyile aan Rapport gesê.
Phillip Dexter, Cope-woordvoerder, sê egter dié groep is nie Cope-jeugleiers nie.
Volgens Dexter is daar vroeër gesê die R5 miljoen is gebruik om party-veldtogte te finansier.
“Dit het niks met pres. Lekota se salaris te doen nie. Of belasting op salarisse betaal is, sal ons uitvind wanneer die ouditeurs ons finansiële state afhandel.”
Intussen het Thabiso Teffo, wat homself die adjunk-voorsitter van die Cope-jeugbeweging noem, gesê: “Ons is nie verbaas oor die groep se optrede nie. Hulle is van die begin af gekant teen Lekota as Cope-leier en steun Shilowa openlik.”
- Rapport