Cope-toekoms dalk vandag bespreek
2011-05-30 09:00
Kaapstad - Cope se leierskorps gaan waarskynlik Maandag die veelbesproke besprekingsdokument oor die toekoms van dié party deurtrap.
In dié dokument getiteld Should Cope just close shop? kritiseer Phillip Dexter, Cope-woordvoerder, die partyleierskorps vir die probleme in die party. Daarvolgens moet Cope-lede ná die besliste swaai weg van hul party in die munisipale verkiesing hulself en die party deeglik ondersoek.
Volgens Dexter het Cope, hoewel dit met ongelooflike energie en aansienlike impak begin is, gou verval in ’n moeras van leierskapstryde, beleidknoeiery, eindelose debatte en ’n kultuur wat die “ergste in die ANC naboots”.
“Vir Cope om te groei en relevant te bly, moet dié projek gered word. Die huidige vraag is: Waarheen nou?” lui die dokument.
“Die straf wat die kiesers uitgedeel het, beteken ongeag die geldigheid van die projek sal dit nie vorder tensy dit omgedraai en weer bekend gestel word nie.”
Faktore wat Cope die meeste verswak het, was volgens Dexter faksies wat hulpbronne misbruik, partybesluite verontagsaam en geweld gebruik het om in tussentydse leierskapsposte aan te bly en die verkiesings wou manipuleer.
Faksiegevegte om die belange van een of twee nasionale leiers te bevorder is nie net verduur nie, maar openlik aangemoedig. Administrasie is agterweë gelaat.
Volgens Dexter moet partylede oor Cope se toekoms besluit. “Óf ons pak die stryd alleen aan óf ons werk en smelt eindelik saam met die ander politieke formasies van die land. Andersins moet die party sy deure sluit en die einde erken van ’n belangrike, maar mislukte eksperiment in demokrasie.”
As besluit word om die party onder ’n nuwe handelsmerk te red, moet ’n nasionale kongres dringend gehou word. “Dit sal beteken dat alle lede moet bedank, ’n geloofwaardige databasis saamgestel en lede by die toekoms van die party betrek moet word.”
Dexter het berigte ontken dat hy Mosiuoa Lekota se leierskap met dié dokument uitdaag. Lekota het volgens Dexter gesê die dokument opper belangrike kwessies. “Ja, dit kritiseer die leierskorps, maar ek is deel daarvan.”
- Volksblad