Cope se kongres in gedrang oor faksies
2010-10-24 10:26
Die faksiegevegte in Cope woed steeds en volgende maand se verkiesingskongres is (weer) in die gedrang.
Kort
op die hakke van Mbhazima Shilowa, adjunkleier, se skorsing as
hoofsweep Maandag het die party Mluleki George, nasionale
organiseerder, gister van faksionalisme en onderduimse gedrag beskuldig.
George
het Vrydag gesê die koste van die ononderhandelbare komende kongres van
5 tot 6 November is reeds betaal, maar Phillip Dexter, amptelike
Cope-woordvoerder, het in ’n verklaring gesê dit is nié.
Om te verklaar dit is reeds betaal, beteken besteding is nie aan die party verklaar nie.
Ander soortgelyke bestedingspraktyke het juis gelei tot die forensiese oudit wat pas afgehandel is.
George is ook oor die kole gehaal omdat hy buite die partystruktuur verklarings aan die media doen.
Hy
is verlede maand weens dieselfde oortreding op die vingers getik toe hy
in sy hoedanigheid as organiseerder aangekondig het alles verloop
klopdisselboom vir die langverwagte kongres.
’n Spesiale vergadering sal môre byeengeroep word om George se gedrag te bespreek.
Shilowa
en Lolo Mashiane (verantwoordelik vir parlementêre administrasie)
is Maandag geskors ná ’n aantal mislukte pogings deur Mosioua
Lekota.
Shilowa het na bewering vir die parlement gelieg oor die party se finansiële stelsels. Shilowa ontken enige onwettige optrede.
- Rapport