Cope-leiers kap terug oor aantygings
2010-04-30 09:20
Philda Essop
Kaapstad - ’n Suggestie deur die Cope-leier, Mosiuoa Lekota, dat dié party se parlementêre geldsake toegesmeer word, is van “alle waarheid ontbloot”.
Só het senior partylede teruggekap nadat Lekota aangekondig het dat Cope se parlementêre geldstate, waarby R20 miljoen betrokke is, nie die afgelope jaar geoudit is nie.
Dr. Mvume Dandala, Cope se parlementêre leier, en Charlotte Lobe, sekretaris-generaal, het in ’n gesamentlike verklaring gesê dié party se geldsake is vroeër deur die werkkomitee en die parlementêre koukus bespreek.
Die koukus het geen rede gesien vir “haastige ingryping” nie.
“Luidens die parlementêre voorskrifte word geouditeerde state van die vorige boekjaar eers in September en ongeouditeerde bestuursrekeninge aan die einde van Mei vanjaar van politieke partye verwag.
“Dit is baie jammer dat daar ’n suggestie van toesmeerdery is nadat twee partystrukture hulle reeds oor die kwessie uitgespreek het. Dit is van alle waarheid ontbloot. Dit is ook jammer dat dié kwessie wat die hoofsweep as aanspreeklike beampte impliseer, aangeroer word terwyl hy in die buiteland is en homself nie kan verdedig nie.”
Mbhazima Shilowa, Cope se hoofsweep in die Nasionale Vergadering en die party se onderleier, het aan die radiodiens SAfm gesê hy wil nie “emosioneel” op interne partysake reageer nie.
Lekota het Shilowa vir die situasie blameer. Shilowa was volgens Lekota verantwoordelik om ouditeurs twee maande ná die aanvang van die boekjaar aan te stel. Dit is glo nooit gedoen nie.
Spanning bou in Cope op in die aanloop tot die party se nasionale konferensie op 27 Mei. Twee provinsies – die Oos-Kaap en Gauteng – het reeds hul voorkeur vir Shilowa as leier laat blyk.
’n Faksie onder leiding van Shilowa wou glo Maandag op ’n spesiale leiersvergadering ’n mosie van wantroue teen Lekota indien. Die vergadering is afgelas omdat daar nie ’n kworum was nie.
Intussen is beweer die sakeonderneming van Malusi Booi, sekretaris van Cope se jeugvleuel, het glo ’n kontrak van R580 000 gekry om dié party se parlementêre kantore toe te rus met bykomstighede waarop die die party se logo is. ’n Tender hiervoor is nooit geadverteer nie.
- Die Burger