Cope-leier hof toe ná herrie oor The Spear
2012-07-29 19:11
Kaapstad – Mosiuoa Lekota, leier van Cope, wil die parlement dagvaar nadat hy geskors is oor uitlatings wat hy oor pres. Jacob Zuma en die skildery The Spear gemaak het.
Die Weekend Argus berig dat Lekota Maandag dokumente by die hof sal indien vir die omkeer en hersiening van die besluit, sowel as 'n verskoning aan hom en die party.
Lekota het Zuma gekritiseer omdat hy nie die grondwetlike regte van die kunstenaar Brett Murray en Ferial Haffajee, redakteur van die City Press, verdedig het nie.
Die regsaksie sal aan die ANC-adjunkspeaker, Nomaindia Mfeketo, gerig wees.
"Dit is 'n baie gevaarlike presedent indien dit nie uitgedaag en omgekeer word nie. Geen lid van die opposisie mag nie die president kritiseer nie... dit hou ernstige gevolge in vir demokrasie," het Lekota gesê.
Die parlement het bevestig dat hy 'n kennisgewing ontvang het dat die dokumente ingedien sal word, maar sal kommentaar lewer wanneer hy die dokumente ontvang.
– Volg Nuus24 op Twitter
- SAPA
