Cope-lede wag vergeefs op Lekota
2011-03-28 09:13
Bloemfontein - Cope-lede hier het gister vergeefs gewag op die party se president, Mosiuoa Lekota, om die party se verkiesingsmanifes te kom bekend stel.
Sowat 100 mense het byeengekom vir die geleentheid om 10:00 by die gemeenskapsaal in Batho.
Maar om 12:30 is aan Volksblad, Die Burger se susterskoerant, gesê Lekota kon “weens ander dringende verpligtinge” nie kom nie.
Mdzipho Kalipa, hoof van Cope se verkiesingsveldtog, en Dennis Bloem, Vrystaatse Cope-LP, het die party se leiers verteenwoordig.
“Cope is steeds die party vir alle mense. Ons sal Suid-Afrikaners nie teleurstel nie. Ons is reg vir die verkiesing en wil ’n verbetering in inwoners se lewe bring.”
Kalipa het gesê die party berus hom by die beslissing van die Wes-Kaapse hooggeregshof Vrydag dat Lekota die leier is.
“Ons sien die land se mense ly honger weens korrupsie. Ons is nie soos die regerende party wat elke vyf jaar voor ’n verkiesing skielik sien die mense is honger nie.
“Cope sal sorg dat ontwikkeling plaasvind en die land se infrastruktuur verbeter word.”
* Daar was gister geen provinsiale kandidatelys beskikbaar nie. Die party se provinsiale bestuur het nie op navrae gereageer nie. Maar ’n SMS het gesê: “Die verrigtinge is nie deur provinsiale of streekstrukture gereël nie, maar deur individue.”
- Volg Nuus24 op Twitter.
- Die Burger