Cope-faksie verban wat glo nuwe party gestig het
2010-07-18 11:16
Llewellyn Prince, Suné Kitshoff
Gauteng - ’n Faksie binne Cope is uit die party “verban” nadat hulle glo ’n wegbreek-party gestig het.
Intussen word die magstryd binne Cope al hoe erger, veral in die Vrystaat en KwaZulu-Natal. Faksies beskuldig mekaar onder meer van spioenasie en rasbeheptheid.
In die Vrystaat is mnre. Mofihli Likotsi, Moshoeshoe Likotsi, Mahlomola Ralebese, Dumile Nana en Mqenekelwa Nyamane uit Cope geskop nadat hulle glo ’n nuwe politieke party, die United Residents Front (URF), gestig het.
Mofihli Likotsi is nommer 22 op Cope se nasionale kandidatelys. Die ander vier beklee hoë posisies in Cope se provinsiale en streekstrukture.
Sello Dithebe, Vrystaatse Cope-woordvoerder, het gesê stappe is gedoen om te verseker dat Cope aan belangrike provinsiale tussenverkiesings kan deelneem, hoewel die vyf nou uitgeskop is.
“Ons het hulle gevra om hulle van Cope-aktiwiteite te verskoon nadat ons agtergekom het hulle het die URF op 26 Maart by die Onafhanklike Verkiesingskommissie geregistreer. Mofihli Likotsi is leier van dié party.”
Likotsi het egter ontken dat hy ’n nuwe party gestig het en het gesê hy bly lid van Cope.
Volgens hom is die URF ’n gemeenskapsorganisasie wat al sedert 1993 bedryf word. “Ons het dit net geregistreer om dit te wettig, maar wil nie aan verkiesings deelneem nie.”
In KwaZulu-Natal het ’n e-pos in die naam van Mthokozisi Myende (Cope-jeugleier) die bedankings aangekondig van me. Niki Moore (kommunikasiehoof) en Piet Breedt (adjunkvoorsitter). Hulle is van ’n “rasse-diktatorskap” beskuldig.
Myende het egter Maandag ontken dat hy dit gestuur het en gesê die inhoud is onwaar.
Moore het by navraag gesê sy het nooit bedank nie.
Cope se tussentydse leierskap in die provinsie het gister vergader om die voorval te bespreek.
Phillip Mhlongo, Cope se provinsiale sekretaris, het gesê Cope “moet uitvind wie ons probeer infiltreer, en ons sal selfs hulp vra van die staat, die polisie.
“Koppe gaan beslis rol… Dit kan die regerende party (ANC) wees wat agter alles sit.”
Mosiuoa Lekota besoek KwaZulu-Natal vandag om lede oor onlangse gebeure in Cope in te lig.